¿DEIXASME-LA RAPAZ?

Fai poucu tiempu paeciu-me tseer  aiquí nu  blog esti  algu refrente a lu de puder pidi-tse a un mozu, mientras  beitsa  cuna rapaza, que tse la deixe  pa seguire beitsandu  el outru cun etsa. Paé-me a mí que lu dixu el rapazón ese tsargu de Llumés que anda pu lus Madriles ya pur una muntunera más de tsugares, que miánicas debe tener la zogue  purque  nun tien  paradoiru. Pois estu del beitse yera asina mesmu cumu lu dixu él. Sobre tou en muitus pueblus del ucidente asturianu, nus cuncexus de Cangas, Tineu ya Pola.  Peru había pueblus tamién que nun se deixaba la parexa, que asina se chamaba a esta xirigonza de tiner que beitsar una rapaza cun varius homes nuna mesma pieza, ya había que respetá-lu. Bonas amarraciones ya griescas  tienen-se amañau  nus beitses de lus pueblus pur esta costume. Cuandu había poucas mozas, algunas detsas pudían beitsare nuna mesma pieza cun tres ou cuatro beitsadores.

La cousa yera más u menus asina. El rapaz que quiría beitsar arrimába-se al pía la parexa que taba beitsandu ya farfutsaba-tse al rapaz estas parulas: deixasme-la;  tamién  dicía-se: cedesme-la, (lus madrileñus cumu yeran unus quiliqueirus más rifinaus dicíantses: ¿me permites?) ya astoncias el rapaz agüechaba de tsau pa la rapaza ya si etsa nun muvía lus güechus u nun punía incunviniente el rapaz tinía que sultá-la ya xebrar  pal mostrador del chigre, u faer él lu mesmu ya  quitátse-la a outru. La que pudía decire que non, sin armar griesca, yera na más la moza. Peru cumu el mozu dixera que non ya taba’l xareu amañau. Nus pueblus de muntaña cuandu chegaban lus furasteirus punían-se d’acuerdu tous lus mozus del pueblu pa nun deixaches beitsar apenas una pieza entera cunas mozas detsus. Na más que d’algunus furasteirus entamaban beitse cunas rapazas del pueblu, al mumentu tinían al tsau una riestra de mozus arrimaus a etsus pa piditses  que se las deixaran ya asina una tras outra hasta que mediu esqueicius anoxaban-se ya fuxían del beitse.  

Esta cousa trai-me l’alcurdanza del miou pueblu que faia-mus el beitse nun parreiru grandón que nus lu deixaba’l  tiu Nemesiu pa lus filandones de las bodas ya pa lus dumingus. Cumu vinian muitus rapaces d'outrus pueblus tinia-mus el xeitu de fae-tses la muxiganga a lus de fora ya subre tou a lus de la Vitsa que vinían a minudu a quita-nus las rapazas muitus dumingus ya pur Navidá. Peru había-lus que na más cuché-la moza tinían que sultá-l'al mumentu, pa esu taba-mus tous bien alietsus pa nun deixá-tses beitsar apenas. Algunas rapazucas prifirían beitsar mexor cunus de la Vitsa que cun nos, purque estus outrus yeran más mudernus peru etsas tinían que aguantá-se ya beitsar cun nos, nun tses quedaba outru rumediu,  anque dixeran que tseiraba-mus a sudor ya cuitu. Estu yera verdá purque tsavucábamus-nus pur partes;  algu'l caretsón, piscuezu ya las urechas peru lus subacones poucas veces lus refrescábamos. Subre tou nel hibiernu. Nel branu yera defrente, purque cumu tábamus a cada poucu esnalazandu ya enriandu l’augua nu riu pa meté-la pa lus praus ya pal mulín, astoncias  tábamus bien frescus ya tsimpius. A veces, miánicas tábamus hasta ribichius cumu lus figus pasus.

Direi-vus que nu miou pueblu había muitas mozas, ya casi todas taban bien culuradas, richonchas  ya frescachonas; muitu guapas ya cun bona peselbera pur delantre. Peru algunas detsas nel mumentu de beitsare puníante’l codo de nun sei que xeitu que nun había dios quien se arrimara a etsas. D’algunas si te arrimabas poucu a poucu, selequinamente  igual te deixaban arrimá-tses un poucu lus papietsus al caretsón, peru había-las más esquivas que las raposas. Falandu destas rapazas esquivas, tinía-mus una que yera cumu una paré de murrillus del riu; cuandu te tucaba beitsar cun etsa, cumu muitu tinías que fae-lu a mediu metru separau. Nun tse tucabas a etsa más que lus didus de las  manus. Nuna ocasión un rapaz que taba pa Madrí ya yera un bon pelgar, ya abondu gandulón  mitiu-se un tarucu duna panocha de maíz pur dientru del pantalón a l’altura la bragueta ya na más puné-se a beitsar cun esta tulondra de moza, etsa nutou-tse el espetietsu aquel duru cumu si fora’l estadueñu del carru ya cumu pinsou que yera la muruquina echouse patrás cumu si queimara ya dexou-lu plantau nu mediu ‘l baile. Nesi mumentu el diablecu aquel sacou el taruco de debaxu'l pantalón ya enseñou-lu a toda la xente; astoncianas  lus rapacinus que tábamus tous  amerandu, espatarramus-nus de risa. Ya aquetsa tarascona diu-se cuenta de que taba fayendu la frasca ya fuxiu toda esnalazada cumu si tuviera tsouca a tou mitere  pa la sua casa. Espués de pasar aquetsu, se ve que pinsou-lu mexor,  ya cuandu vulviu pal beitse ya se deixaba arrimar algu más. ¡Vaya que se deixaba! Miánicas que sí, home non.

“Jesusín”, el pelgar