EL GATSÓN DE NOCHEBUENA

¡Qué pasa oh! Últimamente, toi amurniau da feitu;  miánicas que sí. Tou lu que aldrumeirei you la tempuradina esta datrás, saliu-me turciu pul cumpletu. El merdeiru ese del Cascus, nel que you  tinía muita esperanza, chanfluo-me da feitu; el casu ía que tinía-me bien engatusau el mui castrunzón.  Mal rayu lu parta pu la metá, cachu cabrunazo.

 Cuandu vinía él ya lus sous amigones pa Munietsus al melandru, bien me faía la rosca ya decía-me mientras tsapaba-mus la chinguaniza ya’l choscu que you tsevaba de la mía casina cunu vinín de Cangas pa’lmurzar:  “Jasusín” tú ya sabes,  pa lu que te faiga falta aiquí ta Pacu el valdeasano. Que si  nun hay nuvedá, voi faé-me  cunu Principau dientru de poucu tiempu; ya astoncias ta tou risueltu. Al menus pa ti ya pa lus mious amigones sí. Sí, sí... Agora que lu nicisitaba, cumu’l aire pa respirare, nin putu casu me fixu, válgame San Floxu, chachus.

Las friegas cumu nun me las diera you, taba apañau. Al fenal fixe lu que me ricumendou Rulindes: púnxe lus timbales tous lus días un pouquinín debaxu’l chorru’l augua na fonte pu las nuetis cuando nun había xente. Ya mi alma  funciounou divinamente. Agora téngu-lus  cumu cúcaras, durus  ya pequeninus, outra ve pigaus al culu, cumu anantias de tar malu.

 Desta puxarda de lus pulíticus nun faigais casu dalguno, que son tous unus pelgares ya buqueixones,  melandrinus ya unus sinvergüenzas. Maricones nun tses chamu purque este de Luarca nun lu ía. Al cuntrariu, ta feitu un bon burrón. Mi alma que sí.   Préñalas na más ve-las.

El “prior” esi de lus cuyones  paé-me un poucu espabilau; mira que acierta el muy tunu;  tou lu que dixu de min ya de La Gúmer saliu-tse al dereitu. Tengu hasta canguelu de que ya sepa quien soi. De poucu pa có nun marra un palmu cuandu aldrumeira algu miou u de la peirona de la teutona.

Cumu dixe al escumenzar, toi un poucu desurientau y’amurniau. Falta-me rixu. Igual ía el utuenu. El outru día díxu-me la Rulindes, que miánicas apreciu-la muitu purque  ía una gran rapacina: “Jasusín” , a pesar de  que yeres un rapaz  tuvía, tas feitu un miluetu, sin xeitu algunu,  ya chenu mierda pur nun mantener una muchere na casa xuntu a ti que te axeite un poucu.  Deixar, deixou- me cumu si me diera un paralís nese mumentu. Cumu cuandu tragas un papau de tseite cuachada xelada  sin zuruqui. Peru pinsandu sobre estu que me dixu, igual tien razón esta guaja.

 Lu que pasa ía que you ya soi algu  castrón pa escumenzare agora cun xirigonzas de nuviazgus tardius. Si la pelandru de la Gúmer tuviera sulteira cumu Dios manda, astoncias yera outra cousa, purque you cunetsa entiéndu-me muitu bien, ya gusta-me peru asina tandu pul mediu’l cafre  ese de home que tien, nun fae-mus nin pizca de xeitu.

El outru día taba you falandu cunu vicín miou, mientras arramába-mus el cuitu nus praus, que esti rapaz tseva ya casau muitus anus,  ya decia-me que, rifiriéndu-se a lu outru,  faía muitu tiempu que nun lu gulía. Ya sabéis a lu que me refieru. Dicía que la sua muchere prefería barrer la corte de lus gurinus mil veces, u tsavar un balde enteiru de roupa , antes de puné-se debaxu pa lu outru. Tamién me dixu que anantias lus sábados, si le esqueiraba cun xeitu un pouquinín nus baxus al mité-se nu cubil, agual terminaban fayéndu-lu, peru dun tiempu pacó nun hai manera. Dixu-me que cuandu él diz de dir pal camastru, etsa pon-xe a planchare la roupa pa que él vaya primeiru a durmire  ya asina cuandu etsa chega,  él ya  ta durmiu cumu un tulondru. Pu la mañena , si él ta un poucu alietsu,ya intenta esqueiratse algu nus baxus, u simplemente apalpare, alredor de la pelambrera, etsa ditse que la deixe en paz que tien muitu suenu ya que trasnuchou muitu pa puder planchare el muntunísimu de faragachus de la roupa que tinía pa tras asperándu-la. Tal que, nun tse queda outru rumediu al  probe que tsevantá-se, tsapar la escudietsa‘l tseite migau, ya cuchere el ruedu ya la furcada ya dire pa lus praus a entretenere las ganas de reblincar calcandu las touperas ya inriandu'l augua pu lus fuerus de las presas. You escuitandu estu digu pa mí: “Jasusín” que bien tas asina solu; lu que diz el refrán: buey valeiru bien se retsambe. ¡Home non!

Outru amiente, ía virdá, que agora tengu que buscá-lu pur fora, peru si la peirona teutona nun se esfutsara el caretu , a min cumu vus dixe,  gustába-me muitu ya miánicas tinía-lu risueltu el asuntu de la chapadera, pois na más ve-la puníame cumu’l burrón cuandu güel las gochas cerquina. Peru nun ta nada clara la cousa. Al fenal nun sei lu que faerei. Tendrei que pinsá-lu. A lus flairones nun tses priguntu purque la respuesta detsus ya la sei you bien cual ía. Además, etsus tan lu mesmu que you, peru etsus tienen la coima de que las parroquianas detsus son  muitas más que las mías. Voi deixa-vus rapaces, que tengu pendiente pechar el capuneiru de la pitas, nun vaya a vinire pu la nueite la demoniu la rapiega ya m’esfarrape las pitinas yal gatsón de Nochebuena.

“Jesusín”, el pelgar